У ходзе лютаўскага прыёму грамадзян да кіраўніка прыродаахоўнага ведамства звярнуліся прадстаўнікі ТАА “Аўтаідэя” з пытаннем магчымасці падтрымкі эка-ініцыятывы па добраўпарадкаванні і азеляненні – Андрэй Худык выказаў гатоўнасць супрацоўнічаць.
Сказана – зроблена!11 красавіка ў жылым комплексе “Зялёная гавань” (Мінскі раён) з’явілася алея будучага Парку тысячы раслін. Высадзіць саджанцы сабраліся больш за 100 ганаровых гасцей. У мерапрыемстве таксама прынялі ўдзел прадстаўнікі цэнтральнага апарата Мінпрыроды і Мінскага абласнога камітэта прыродных рэсурсаў і аховы навакольнага асяроддзя.
У гэты дзень было высаджана 138 дрэў, што забяспечыць выпрацоўку кіслароду да 16,5 тон і паглынанне вуглякіслага газу да 3 тон штогод. Тэрыторыю ўпрыгожылі маладыя елкі, хвоі, бярозы, клёны і рабіны, якімі можна будзе любавацца з сярэдзіны вясны да канца восені – у кожны сезон парк расчыніцца рознымі адценнямі, гукамі і пахамі. На алеі ўсталяваны памятны пілон.
Работы па фарміраванні парку пройдуць у найбліжэйшыя месяцы, адкрыццё аб’екта запланавана да канца года. Арганізатары мерапрыемства – А-100 Дэвелапмент і ТАА «Аўтаідэя» – адзначылі, што дадзеная сумесная эка-ініцыятыва праходзіць у рамках дэкларацыі намеру падтрымкі ESG стратэгіі.
Апроч паркаў, у Зялёнай гавані развіваюць інфраструктуру для электрамабіляў. У жылых кварталах і на стаянках ужо працуюць зарадныя станцыі Forevo. У бліжэйшыя гады іх стане ў дзясяткі разоў больш – усяго 140 электразаправак.
