10 кастрычніка 2024 года на сталічным веладроме прайшоў адкрыты дыялог на тэму “Экалогія як аснова жыцця” з удзельнікамі праекта “Мінская змена”.
Сярод экспертаў дыскусіі: міністр прыродных рэсурсаў і аховы навакольнага асяроддзя Сяргей Масляк, старшыня Пастаяннай камісіі па экалогіі і прыродакарыстанні Палаты прадстаўнікоў Нацыянальнага сходу Жанна Чарняўская, старшыня Мінскага гарадскога камітэта прыродных рэсурсаў і аховы навакольнага асяроддзя Валянцін Шатраўка. Мадэратарам гутаркі выступіла намеснік старшыні Мінскага гарадскога камітэта прыродных рэсурсаў і аховы навакольнага асяроддзя Таццяна Дубік.
Запрошаныя госці пагаварылі з моладдзю аб важнасці экалогіі ў жыцці чалавека, аб асаблівасцях экасістэмы Мінска, як неабыякавыя людзі могуць дапамагчы ў захаванні чыстага і зялёнага горада.
Экалогія ў нашым жыцці прысутнічае паўсюдна. Чым вышэй ВУП і чым больш тавараў мы вырабляем, тым больш увагі трэба надаваць пытанням экалогіі. Мне прыемна, што сёння многія арганізацыі ідуць па шляху “зялёнай” эканомікі, калі ў іх або не застаецца адходаў, або калі адходы аднаго прадпрыемства могуць стаць матэрыялам для вытворчасці прадукцыі іншага. Гэта вельмі важна, калі нароўні з такімі словамі, як інавацыя, экспартаарыентаванасць, імпартазамяшчэнне, у нашым ужытку з’яўляецца яшчэ адно – экалагічнасць, – адзначыў Сяргей Масляк.
Удзельнікам праекта расказалі аб заканадаўстве ў сферы аховы навакольнага асяроддзя, якія экалагічныя праблемы сёння актуальныя.
Таксама спікеры азнаёміліся з праектамі моладзі, якія датычацца экалагічнай тэматыкі. Фіналісты маглі задаць экспертам пытанні.
