У мэтах выканання даручэння Кіраўніка дзяржавы Аляксандра Лукашэнкі па далейшым развіцці дзяржаўнай прыродаахоўнай навукова-даследчай установы “Палескі дзяржаўны радыяцыйна-экалагічны запаведнік”, арганізацыя разам з іншымі напрамкамі дзейнасці вялікую ўвагу ўдзяляе гадавальнікаводству – вырошчванню пасадачнага матэрыялу, у тым ліку дэкаратыўных раслін.
Так, вясной мінулага года ўстановай за кошт уласных сродкаў набыты 4 цяпліцы з аўтаматызаванай арашальнай сістэмай верхняга мікрадажджання, завезены ў іх спецыяльны пажыўны грунт і неабходныя ўгнаенні, закладзены зялёныя тронкі розных дэкаратыўных відаў, такіх як туя, ядловец, кіпарысавік, самшыт і іншыя. У цяперашні час у цяпліцах вырошчваецца больш за 150 тысяч дэкаратыўных раслін названых відаў.
Прадукцыя, якую дэманстраваў запаведнік на розных выставах як абласнога, так і рэспубліканскага ўзроўняў, карысталася ў насельніцтва вялікім попытам. І, як заканамерны вынік, было прынятае рашэнне па павелічэнні аб’ёмаў яе рэалізацыі.
У мэтах пашырэння рынкаў збыту дырэкцыяй Палескага запаведніка запушчаны “пілотны” праект па рэалізацыі саджанцаў дэкаратыўных раслін розных відаў і ўзростаў на заправачных станцыях Гомеля. Першай стала АЗС № 17 “Беларуснафта-Гомельаблнафтапрадукт” у аграгарадку Яроміна. Сёння сюды дастаўлена першая партыя прадукцыі.
Цяпер кожны ахвочы можа на месцы азнаёміцца з прадукцыяй запаведніка і набыць гэты, без сумнення, якасны тавар для ўласных патрэб.
