Сёння Кіраўнік дзяржавы Аляксандр Лукашэнка сабраў у Палацы Незалежнасці нараду аб асноўных напрамках работы па ўдасканаленні якасці ў 2024 годзе і Знаку якасці Рэспублікі Беларусь.
«Першая наша рабочая нарада ў гэтым годзе на ўзроўні Прэзідэнта датычыцца галоўнай тэмы - Года якасці. Мы вызначылі вельмі амбіцыйную мэту: паставіць кантроль якасці вырабляных тавараў і паслуг, якасці жыцця краіны на больш высокі ўзровень, - сказаў Аляксандр Лукашэнка. - Беларусь можа ганарыцца сваімі якаснымі таварамі, але каб быць у трэндзе, каб канкурыраваць з лепшымі сусветнымі ўзорамі, трэба крыху дадаць, трэба заслужыць гэты знак якасці».
У гэтым імкненні беларусам ёсць ад чаго адштурхоўвацца, падкрэсліў Кіраўнік дзяржавы. Па-першае, ад традыцый – рэспубліка захавала пераемнасць савецкай эпохі.
«Гэты гістарычны перыяд даў старт нашаму нацыянальнаму развіццю. Цяпер вы разумееце, чаму (як мяне крытыкавалі) я «чапляюся» за той савецкі час: калі б не было таго савецкага часу, не было б самых сучасных і новых узораў. Загубіць усё – прасцей, але на базе чаго мы б стваралі новыя, прагрэсіўныя ўзоры? Гэтай базы б не было. Разумныя людзі захоўваюць і развіваюць усё тое, што назапашана ранейшымі пакаленнямі. Мы гэта зрабілі», – адзначыў беларускі лідэр.
Аляксандр Лукашэнка нагадаў, што эканоміка БССР была адной з найбольш тэхналагічных і развітых сярод іншых саюзных рэспублік. «Перажыўшы разруху 90-х, нам няпроста было зберагчы створаныя працай савецкіх людзей стандарты якасці, але мы гэта змаглі зрабіць, – заявіў ён. – Людзі ў такі пераплёт трапілі, што дзявацца проста не было куды. Выкараскаліся. Сёння ствараем самыя сучасныя ўзоры тэхнікі. Але кажу шчыра: якасці яшчэ не хапае. У спіну дыхаюць нашыя канкурэнты. І ўсё, што мы вырабляем у Беларусі, вырабляецца ў дзясятках краін свету».
Па-другое, у Беларусі сфарміраваны імідж пераемніцы лепшых савецкіх дасягненняў. І тое, як беларусы спраўляюцца з сучаснымі выклікамі, дэманструе разумнасць і дальнабачнасць выбару народа, адзначыў Прэзідэнт.
«Па-трэцяе, мы бачым узрастаючы попыт на каштоўнасці сацыяльнай дзяржавы. І не толькі на постсавецкай прасторы – па ўсім свеце. Вяртанне да гэтых каштоўнасцяў – пытанне якасці жыцця людзей: духоўнай сферы, эканамічнага дабрабыту, сацыяльнай справядлівасці. Усё тут узаемазвязана. Таму, калі мы гаворым пра якасць і што рабіць, чагосьці чакаем (праграма, натуральна, будзе), чакаць нічога не трэба. Калі нехта не ведае, з чаго пачаць, пачынайце з сябе: своечасова прыходзьце на сваю працу і рабіце сваю справу вельмі якасна. Тут кожны ведае, як гэта рабіць», – рэзюмаваў Кіраўнік дзяржавы.
Падрабязная інфармацыя аб мерапрыемстве размешчана на сайце Афіцыйны інтэрнэт-партал Прэзідэнта Рэспублікі Беларусь
