Галіновая навукова-практычная канферэнцыя “Гарманізацыя нарматыўнага рэгулявання навукова-абгрунтаваных мер экалагічнай бяспекі і адаптацыі да змянення клімату ў рамках Саюзнай дзяржавы” праходзіць сёння, 24 студзеня, у Мінску. Мерапрыемства прымеркавана да Дня беларускай навукі.
Як адзначыў у ходзе мерапрыемства Міністр прыродных рэсурсаў і аховы навакольнага асяроддзя Андрэй Худык, у Беларусі за гады незалежнасці з’явілася шмат добрых традыцый:
Святкаванне Дня беларускай навукі, уведзенае 30 гадоў таму нашым Прэзідэнтам, – не проста традыцыя, а аснова асноў канкурэнтаздольнасці краіны. У Беларусі навуцы ўдзяляецца асаблівая ўвага. Гэта важна, паколькі краіна не настолькі багатая на даступныя прыродныя рэсурсы. Таму інавацыйнасць і навукаёмістасць – гэта наш канёк, на якім мы трымаемся на сусветным рынку.
Што датычыцца святочных дзён, паводле слоў міністра, у краіне праводзіцца нямала мерапрыемстваў. І навукова-практычная канферэнцыя – адно з іх. Яе актуальнасць абумоўлена неабходнасцю вырашэння сучасных глабальных экалагічных праблем і выклікаў.
Кіраўнік ведамства нагадаў: у склад Мінпрыроды ўваходзяць 5 навуковых арганізацый, у ліку якіх РУП “БелНДЦ “Экалогія”, ДП “Навукова-практычны цэнтр па геалогіі”, РУП “Цэнтральны навукова-даследчы інстытут комплекснага выкарыстання водных рэсурсаў”, Белгідрамет, Палескі дзяржаўны. радыяцыйна-экалагічны запаведнік, а таксама 190 вучоных. Менавіта яны даюць навуковае суправаджэнне 14-ці напрамкам, за якія адказнае Мінпрыроды. Гэта комплекснае рацыянальнае выкарыстанне водных рэсурсаў, гідраметэаралогія, развіццё мінеральна-сыравіннай базы краіны і шмат іншага.
Нашу канферэнцыю можна назваць міжнароднай, паколькі мы вельмі цесна супрацоўнічаем з нашымі суседзямі, асабліва з Расійскай Федэрацыяй, – падкрэсліў Андрэй Худык. – У нас ёсць агульныя саюзныя праграмы, якія дазваляюць вывесці на новы ўзровень тыя напрамкі, якімі займаецца Мінпрыроды. І сёння мы будзем абмяркоўваць пытанні, якія неабходна вырашаць разам.
Таксама ён выказаў падзяку беларускім ВНУ, якія прымаюць удзел у мерапрыемстве. У прыватнасці, з імі ведамства вырашае пытанні кадравага патэнцыялу, маладых вучоных і іх будучыні.
Ва ўсе часы навука з’яўлялася магутным рэсурсам эканамічных і сацыяльных пераўтварэнняў, найважнейшым складальнікам нацыянальнага багацця, рухаючай сілай тэхнічнага прагрэсу, – адзначыў Андрэй Худык. – І беларуская навука сёння – важны складнік нашай нацыянальнай бяспекі. Мінпрыроды трымае пытанне на кантролі і стварае неабходныя ўмовы работы вучоным, каб вырашаць задачы, пастаўленыя перад Мінпрыроды Кіраўніком дзяржавы.
