Сёння адбылася онлайн сустрэча паміж Міністрам прыродных рэсурсаў і аховы навакольнага асяроддзя Рэспублікі Беларусь Андрэем Худыкам і дырэктарам Кітайскай геалагічнай службы Лі Цзіньфа. Мерапрыемства прайшло на базе Рэспубліканскага цэнтра дзяржаўнай экалагічнай экспертызы, падрыхтоўкі, павышэння кваліфікацыі і перападрыхтоўкі кадраў Мінпрыроды.
Акрамя кіраўніцтва і супрацоўнікаў сістэмы Мінпрыроды ад беларускага боку ў мерапрыемстве прынялі ўдзел прадстаўнікі Міністэрства эканомікі, Нацыянальнага банка, Вытворчага аб’яднання “Беларуснафта”, Нацыянальнай акадэміі навук, Нацыянальнага агенцтва інвестыцый і прыватызацыі.
Сумесна з кіраўніком Кітайскай геалагічнай службы на сустрэчы прысутнічалі кіраўніцтва і прадстаўнікі некалькіх дэпартаментаў, Цэнтра вывучэння нафтагазавых рэсурсаў і Сіанскага цэнтра геалагічнай службы КНР.
Адкрываючы мерапрыемства, кіраўнік беларускага прыродаахоўнага ведамства шчыра падзякаваў кітайскаму боку за гатоўнасць аказаць падтрымку Рэспубліцы Беларусь у развіцці геалагічнай галіны: “Абмен вопытам, тэхналогіямі і сумеснае павышэнне кваліфікацыі нашых геолагаў будуць вельмі важныя для абедзвюх краін”.
Андрэй Худык выказаў упэўненасць, што гэта сустрэча будзе садзейнічаць паглыбленню беларуска-кітайскага супрацоўніцтва ў галіне рацыянальнага выкарыстання прыродных рэсурсаў, а таксама з’яўляецца пацвярджэннем сапраўднага шчырага дружбы як паміж краінамі, так і кіраўнікамі Беларусі і Кітая.
У ходзе перагавораў Міністр падкрэсліў, што вопыт Кітайскай геалагічнай службы ўяўляе для беларускага боку вялікую цікавасць, і запрасіў дырэктара Кітайскай геалагічнай службы з камандай інвестараў наведаць з візітам Рэспубліку Беларусь, пагутарыць з вядучымі геолагамі краіны і на свае вочы ўбачыць магчымасці для эфектыўнага развіцця двухбаковага супрацоўніцтва Беларусі і Кітая.
«Мы ведаем Кітай як высокатэхналагічную краіну з багатай гісторыяй развіцця геалагічнай галіны. Са свайго боку мы таксама гатовы дзяліцца сваім вопытам, – заявіў ён. – Рэспубліка Беларусь мае значны патэнцыял розных карысных выкапняў. Улічваючы геаграфічнае размяшчэнне Рэспублікі Беларусь, да нас выгадна прыходзіць не толькі для іх разведкі і здабычы, але і для перапрацоўкі і наступнага экспарту на вялізныя рынкі краін Еўразійскага эканамічнага саюза, ЕС і іншыя».
- Кітайскі вопыт і тэхналогіі пошуку, разведкі і здабычы вуглевадародаў;
- Нафтагазаноснасць Рэспублікі Беларусь, праблемы і перспектывы развіцця галіны;
- Інвестыцыйны клімат Рэспублікі Беларусь;
- Прэзентацыя шэрага беларускіх інвестыцыйных праектаў, у тым ліку па здабычы і вытворчасці прадукцыі з базальту;
- Заканадаўчае рэгуляванне нетракарыстання ў нашай краіне;
- Перспектывы стварэння ў Беларусі сумеснага геалагічнага цэнтру.
«Мы даволі актыўна супрацоўнічаем з кітайскімі калегамі ўжо некаторы час, і на сённяшні дзень разумеем, што Кітай – высокаразвітая краіна, асабліва ў пытаннях геолагаразведкі, здабычы карысных выкапняў, іх перапрацоўкі і інтэнсіфікацыі выкарыстання. У сувязі з гэтым мы папрасілі нашых партнёраў падзяліцца вопытам у частцы геолагаразведкі вуглевадародаў. Адзначу, што мы атрымалі вельмі цікавую інфармацыю, якую яшчэ трэба будзе вывучыць», – распавёў Андрэй Худык аб выніках сустрэчы.
Паводле яго слоў, у ходзе перагавораў таксама была дасягнута дамоўленасць аб абмене дэлегацыямі і навучанні беларускіх кадраў.
“Перакананы, што сённяшнія прапановы і канкрэтныя паслядоўныя крокі, аб якіх нам удалося дамовіцца, дадуць магчымасць выканаць даручэнне Кіраўніка дзяржавы па інтэнсіфікацыі мінеральна-сыравіннай базы ў Беларусі”, – сказаў кіраўнік Мінпрыроды.
Кіраўнік ведамства дадаў, што на сустрэчы былі прадстаўлены некалькі беларускіх інвестпраектаў, у тым ліку па радовішчы Навадворскае, у якім будуць здабываць базальты і туфы.
«Нашы кітайскія калегі ўжо шукаюць нам патэнцыйных фундатараў на тэрыторыі КНР. Ёсць некалькі буйных сусветных кампаній, якія выказалі жаданне прыбыць у Беларусь і на месцы вывучыць гэты інвестпраект. Мы ўпэўненыя, што крок за крокам прыйдзем да добрага выніку. Безумоўна, такія сур’ёзныя праекты хутка не ствараюцца», – рэзюмаваў Андрэй Худык.
Таксама Міністр падзяліўся планамі па стварэнні сумеснага беларуска-кітайскага геалагічнага цэнтра ў Беларусі.«Яшчэ ў верасні мінулага года мы дамовіліся аб стварэнні сумеснага геалагічнага цэнтра “Беларусь-Кітай”. Сёння кітайскія калегі пацвердзілі нам свой намер. Галоўны геолаг Кітая паабяцаў у бліжэйшы час прыбыць з камандай у Беларусь і канкрэтна вырашаць гэтае пытанне. Падобны досвед у Кітая ёсць. Спадзяемся, што тыя прапановы, якія сёння прагучалі з боку калег па сумесных праектах у праграмах краін ШАС, таксама ў бліжэйшы час магчымы для нашай краіны», – сказаў кіраўнік беларускага прыродаахоўнага ведамства.
З выкарыстаннем матэрыялаў БЕЛТА
